ಆನೇಕಲ್ ತಾಲೂಕಿನ ಜಿಗಣಿಯ ರೆಡ್ಡಿ ಜನಸಂಘದ ವತಿಯಿಂದ ಮಹಾಯೋಗಿ ವೇಮನ ಜಯಂತಿ ಆಚರಿಸಲಾಯಿತು. ಬಮೂಲ್ ನಿರ್ದೇಶಕ ಆರ್.ಕೆ. ರಮೇಶ್ ಮತ್ತು ಟಿಪಿಸಿಎಂಎಸ್ ಅಧ್ಯಕ್ಷ ಬಾಬುರೆಡ್ಡಿ ಅವರು ಮೆರವಣಿಗೆಗೆ ಚಾಲನೆ ನೀಡಿದರು.
ಜಿಗಣಿ ಮುಖ್ಯ ರಸ್ತೆಗಳಲ್ಲಿ ಹೂವಿನ ಪಲ್ಲಕಿಯಲ್ಲಿ ವೇಮನರ ಭಾವಚಿತ್ರವನ್ನು ಹೊರುವ ಮೂಲಕ ಭಕ್ತರ ಮೆರವಣಿಗೆ ನಡೆಯಿತು. ವೀರಗಾಸೆ, ನಂದಿಧ್ವಜ, ತಮಟೆ, ಡೊಳ್ಳುಕುಣಿತ ಸೇರಿದಂತೆ ಜಾನಪದ ಕಲಾತಂಡಗಳು ಉತ್ಸವಕ್ಕೆ ರಂಗ ಹಾಕಿದವು.
ಟಿಪಿಸಿಎಂಎಸ್ ಅಧ್ಯಕ್ಷ ಹೆನ್ನಾಗರ ಬಾಬುರೆಡ್ಡಿ ಮಾತನಾಡಿ, “ವೇಮನರ ತತ್ವಪದಗಳು ಸಮಾಜದ ಅಸಮಾನತೆಗಳನ್ನು ತೊಡೆದುಹಾಕುತ್ತವೆ. ಸಾಧಕರ ತತ್ವ-ಆದರ್ಶಗಳನ್ನು ಜಾತಿಗಳಿಗೆ ಸೀಮಿತಗೊಳಿಸದೇ ಎಲ್ಲರೂ ಅಳವಡಿಸಿಕೊಳ್ಳಬೇಕು” ಎಂದರು.
ಬಮೂಲ್ ನಿರ್ದೇಶಕ ಆರ್.ಕೆ. ರಮೇಶ್ ಹೇಳಿದರು, “ಬಸವಣ್ಣ, ಕನಕದಾಸ, ಅಂಬೇಡ್ಕರ್, ವೇಮನರಂತಹ ಮಹಾನ್ ವ್ಯಕ್ತಿಗಳು ವಿಶ್ವಮಾನವತೆಯ ಸಂದೇಶ ನೀಡಿದ್ದಾರೆ. ಯುವಕರು ಇವರ ಸಿದ್ಧಾಂತಗಳನ್ನು ಜೀವನದಲ್ಲಿ ಜೀವಂತಗೊಳಿಸಿ ಸಾಮಾಜಿಕ ಸೌಹಾರ್ದ ಅಳವಡಿಸುವಂತೆ ಮಾಡಬೇಕು.”
ಜಿಗಣಿ ಪುರಸಭಾ ಸದಸ್ಯ ಪ್ರಹ್ಲಾದರೆಡ್ಡಿ, ಪುನೀತ್, ಹುಲಿಮಂಗಲ ರಾಜಗೋಪಾಲರೆಡ್ಡಿ ಸೇರಿದಂತೆ ರೆಡ್ಡಿ ಜನಸಂಘದ ನಾಯಕರು, ಗ್ರಾಮಸ್ಥರು ಉಪಸ್ಥಿತರಿದ್ದರು.
ವರದಿ :- ಆಂಟೋನಿ ಪತ್ರಕರ್ತ
