ನಿಜಾಮಾಬಾದ್ ಜಿಲ್ಲೆಯೊಂದರಲ್ಲಿ ನಡೆದಿರುವ ಈ ಘಟನೆ, ಅಧಿಕಾರದ ಲಾಲಸೆ ಮನುಷ್ಯನನ್ನು ಎಷ್ಟು ಹೀನ ಮಟ್ಟಕ್ಕೆ ಇಳಿಸಬಹುದು ಎಂಬುದಕ್ಕೆ ಭೀಕರ ಉದಾಹರಣೆಯಾಗಿದೆ. ಗ್ರಾಮ ಪಂಚಾಯತ್ ಚುನಾವಣೆಯಲ್ಲಿ ಸ್ಪರ್ಧಿಸುವ ಅವಕಾಶಕ್ಕಾಗಿ, ತನ್ನದೇ ಮಗಳನ್ನು ಕೊಲೆ ಮಾಡಿದ ತಂದೆಯ ಕ್ರೂರ ಕೃತ್ಯ ಇದೀಗ ಬಹಿರಂಗವಾಗಿದೆ.
ಮಹಾರಾಷ್ಟ್ರದ ಮುಖೇಡ್ ತಾಲ್ಲೂಕಿನ ಕೆರೂರ್ ಗ್ರಾಮದ ನಿವಾಸಿ ಕೊಂಡಮಂಗಲೆ ಪಾಂಡುರಂಗ ಎಂಬ ವ್ಯಕ್ತಿ ಈ ಅಮಾನುಷ ಕೃತ್ಯ ಎಸಗಿದ್ದಾನೆ. ಪತ್ನಿ ಹಾಗೂ ಮೂವರು ಮಕ್ಕಳನ್ನು ಹೊಂದಿದ್ದ ಈತ, ಮುಂಬರುವ ಗ್ರಾಮ ಪಂಚಾಯತ್ ಚುನಾವಣೆಯಲ್ಲಿ ಸರಪಂಚ್ ಸ್ಥಾನಕ್ಕಾಗಿ ಸ್ಪರ್ಧಿಸುವ ಆಸೆ ಪೋಷಿಸಿಕೊಂಡಿದ್ದನು.
ಆದರೆ ಮಹಾರಾಷ್ಟ್ರದಲ್ಲಿ ಜಾರಿಯಲ್ಲಿರುವ ನಿಯಮದಂತೆ ಮೂವರು ಮಕ್ಕಳಿದ್ದವರಿಗೆ ಚುನಾವಣೆಯಲ್ಲಿ ಸ್ಪರ್ಧಿಸಲು ಅವಕಾಶವಿಲ್ಲ. ಈ ನಿಯಮವೇ ಪಾಂಡುರಂಗನ ರಾಜಕೀಯ ಕನಸಿಗೆ ದೊಡ್ಡ ಅಡ್ಡಿಯಾಗಿತ್ತು. ತೆಲಂಗಾಣದಲ್ಲಿ ಇಂತಹ ನಿರ್ಬಂಧ ಇಲ್ಲದಿದ್ದರೂ, ತನ್ನ ಊರಿನಲ್ಲಿ ಸ್ಪರ್ಧಿಸಲು ಸಾಧ್ಯವಾಗದೇ ಇದ್ದುದರಿಂದ ಆತ ಅತಿಯಾದ ನಿರ್ಧಾರಕ್ಕೆ ಇಳಿದಿದ್ದಾನೆ.
ಮೊದಲು ತನ್ನ ಮಕ್ಕಳಲ್ಲಿ ಒಬ್ಬರನ್ನು ದತ್ತು ನೀಡುವ ಯತ್ನ ನಡೆಸಿದನು. ಮಗನನ್ನು ಬೇರೆ ಕುಟುಂಬಕ್ಕೆ ಒಪ್ಪಿಸುವ ಪ್ರಯತ್ನವೂ ನಡೆದಿತ್ತು. ಆದರೆ ಜನನ ಪ್ರಮಾಣ ಪತ್ರ ದಾಖಲೆಗಳ ಕಾರಣದಿಂದ ಅದು ಸಾಧ್ಯವಾಗಲಿಲ್ಲ. ದಾಖಲೆ ಬದಲಾಯಿಸಲು ಪುಣೆ ಕಾರ್ಪೊರೇಷನ್ ಕಚೇರಿಗಳಿಗೂ ಅಲೆದಾಡಿದ್ದಾನೆ ಎಂಬ ಮಾಹಿತಿ ದೊರೆತಿದೆ.
ಎಲ್ಲ ಪ್ರಯತ್ನಗಳು ವಿಫಲವಾದ ಬಳಿಕ, ಮಕ್ಕಳಲ್ಲಿ ಒಬ್ಬರನ್ನು ಶಾಶ್ವತವಾಗಿ ದೂರಮಾಡುವ ಅಮಾನುಷ ಸಂಚನ್ನು ರೂಪಿಸಿದ್ದಾನೆ. ಈ ಸಂಚಿನಲ್ಲಿ ಪ್ರಸ್ತುತ ಸರಪಂಚ್ ಶಿಂಧೆ ಗಣೇಶ್ ಕೂಡ ಭಾಗಿಯಾಗಿದ್ದಾನೆ ಎನ್ನಲಾಗಿದೆ. ಮಗು ನಾಪತ್ತೆಯಾಗಿರುವಂತೆ ತೋರಿಸಿ ಕಾನೂನಿನ ಕಣ್ಣಿಗೆ ಮಣ್ಣೆರೆಚುವ ಯೋಜನೆ ರೂಪಿಸಲಾಯಿತು.
ಜನವರಿ ಕೊನೆಯ ದಿನಗಳಲ್ಲಿ, “ಊರಿಗೆ ಹೋಗೋಣ” ಎಂದು ಹೇಳಿ ಮಗಳಾದ ಪ್ರಾಚಿಯನ್ನು ಬೈಕ್ ಮೇಲೆ ಕರೆದುಕೊಂಡು ಹೊರಟ ಪಾಂಡುರಂಗ, ನಿಜಾಮಾಬಾದ್ ಜಿಲ್ಲೆಯ ಎಡಪಲ್ಲಿ ಮಂಡಲದ ಎಆರ್ಪಿ ಕ್ಯಾಂಪ್ ಸಮೀಪದ ನಿಜಾಮ್ಸಾಗರ್ ಡಿ-46 ಕಾಲುವೆ ಬಳಿ ನಿಂತಿದ್ದಾನೆ. ಅಲ್ಲಿ ಯಾರೂ ಇಲ್ಲದ ಸಮಯ ನೋಡಿಕೊಂಡು, ತನ್ನದೇ ಮಗಳನ್ನು ಕಾಲುವೆಗೆ ತಳ್ಳಿ ಕೊಂದಿದ್ದಾನೆ.
ಜನವರಿ 30ರಂದು ಕಾಲುವೆಯಲ್ಲಿ ಬಾಲಕಿಯ ಶವ ಪತ್ತೆಯಾದ ಬಳಿಕ ಪೊಲೀಸರು ತನಿಖೆ ಆರಂಭಿಸಿದರು. ಮೂರು ವಿಶೇಷ ತಂಡಗಳನ್ನು ರಚಿಸಿ ಪರಿಶೀಲನೆ ನಡೆಸಿದಾಗ, ಮೃತ ಬಾಲಕಿ ಮಹಾರಾಷ್ಟ್ರ ಮೂಲದ ಪ್ರಾಚಿ ಎಂದು ಗುರುತಿಸಲಾಯಿತು. ನಂತರ ತಂದೆ ಪಾಂಡುರಂಗನನ್ನು ವಿಚಾರಣೆಗೊಳಪಡಿಸಿದಾಗ, ಈ ಭೀಕರ ಸತ್ಯ ಬಹಿರಂಗಗೊಂಡಿದೆ.
ಪ್ರಸ್ತುತ ಆರೋಪಿಯನ್ನು ಬಂಧಿಸಿರುವ ಪೊಲೀಸರು, ಪ್ರಕರಣದ ಎಲ್ಲಾ ಆಯಾಮಗಳ ಕುರಿತು ತನಿಖೆ ಮುಂದುವರೆಸಿದ್ದಾರೆ. ಈ ಘಟನೆ ಸಮಾಜದ ಮಾನವೀಯತೆಯ ಮೇಲೆಯೇ ಪ್ರಶ್ನಾರ್ಥಕ ಚಿಹ್ನೆ ಎತ್ತಿದ್ದು, ಅಧಿಕಾರದ ಹಂಬಲ ಮನುಷ್ಯನಲ್ಲಿನ ತಂದೆಯನ್ನೇ ಹೇಗೆ ಕೊಂದುಹಾಕುತ್ತದೆ ಎಂಬುದನ್ನು ತೋರಿಸಿದೆ.
ವರದಿ :- ಆಂಟೋನಿ ಪತ್ರಕರ್ತ
